• discours d'Annie Wolf présidente de l'IEO Arièja sur le site du Port de Salau lors de la Pujada 2022

Amics,

Qu’un plaser de se tornar trobar al pòrt de Salau aprèp annadas de magrèra per festejar amassa, catalans e occitans, pòbles fraires, una amistat anciana.

M’agradariá de vos dire uèi que tot va plan, que sèm dins la bona draia, que puntejan per las culturas nòstras endemans cantaires: pòdi pas, la vesi pas brica l’esclarida, le solelh vòl pas traucar…

A l’ora d’ara, Catalonha es pas encara independenta, la politicalha a remplaçat las utopias grandas e les grands objectius mobilizadors. Le govèrn cambièt, socialistas aligats a Podemos govèrnan le país e una part dels catalanistas agèron l’esperança d’un dialòg, i an volgut creire; mas espèra qu’esperaràs, res non arriba pas ! D’unes son totjorn exiliats en Belgica, d’elegits al Parlament Europèu son encara perseguits malgrat l’immunitat e i a encara cada jorn de ciutadans desconeguts que passan davant los tribunals per aver participat al referendum considerat coma illegal per Espanha le primièr d’octobre de 2017, amb de multas plan gròssas a pagar.

En defòra de las questions estrictament politicas i a, ara, dins l'actualitat la candidatura catalana als jòcs olimpics d'ivèrn de 2030, que concernís Pirinèus e tot un moviment en contra per rasons ecologicas, en causa del cambiament climatic e de sas consequéncias e contra le modèl economic unic del torisme massís. Le pòple a pas dit sa darrièra paraula 

En çò nòstre, l’occitan se pòt far glòria del sosten dels estatjants, totas las enquistas ne fan testimòni mas les govèrns se seguisson e contunhan son trabalh de sapa per aflaquir l’ensenhament de las lengas minorizadas. Quitament dins Arièja, l’ensenhament de l’occitan desapareis cada an un pauc mai de l’escòla publica. Aquí le drama de la nòstra lenga mespresada . Nos calguèc mobilizar mès d’un còp per fèr véser la nòstra colèra. An pas daissat, les que nos govèrnan, de nos voler fèr crebar ; nos tolèran de mal esquiç e sabi plan que demest nosautres, aparaires de l’occitan, mès d’un pensa que le nòstre combat es una causa perduda.

Justament, son las causas perdudas qu’an besonh de nosautres, las autras se’n pòdon passar. Aquela lenga maltractada dempuèi sègles se parla pasmens al temps que sèm.  Nosautres la gaitarem pas crebar! Benlèu, l’iniciativa recenta de la Region Occitània : « Cultura Viva » endraiada per sa presidenta, Carola Delga, per fargar una politica lingüistica vertadièra per l’occitan e le catalan, aurà consequéncias positivas. Es pas defendut de somiar! Mas, d’ont mai passan les jorns, d’ont mai crentam per deman. Me sembla que las crisis venon pas qu’un escapatòri per nos far engolir tot un fum de decisions que serviràn pas les nòstres interèsses de pauras gents. 

Fin finala, le jorn d’aprèp serà pas tant polit coma èra enquantat! 

Mas viure, es pas sonque le manjar e le beure; a l’Òme li’n cal mai per far de sa vida una existéncia ! Desbrembem pas, ni per totas las empachas de uèi, las batalhas passadas que nos fasquèron çò que sèm a l’ora d’ara. La lenga d’un pòble es quicòm d’essencial, de fondamental, es çò que pòrta son Istòria, sa cultura e la memòria collectiva. Cercar de la redusir o mai encara de la voler far desaparéisser en balhant pas pro d’ajuda als que l’aparan, es una mena de suicidi.

Se la lenga se pèrd, nos perdrem amb ela. E le combat per l’identitat e la cultura se pòt pas desseparar dels autres. Ja e tan melhor, espelisson moviments de resisténcia que son a l’imatge dels combats que nos caldrà menar per fargar le mond de deman sus una tèrra durabla e solidària que totes les òmes e totas las culturas s’i poiràn espandir e que i regnarà le saber mai que l’ignorància, la cooperacion mai que la concurréncia, l’òme mai que l’argent.

Al nom de l’IEO d’Arièja, grandmercé a Annia Rieu e a l’ASPIC coma al CAOC per aquela jornada bèla de convivéncia. 

 « I caminem per poder ser, i volem ser per caminar. » 

Òsca e longa vida. Visca Catalunha liura, visca Occitània.

Les textes des discours de Nuria Bayo et d'Annie Rieu de la 25ème Pujada sont en ligne, vous pouvez les trouver en cliquant sur la rubrique discours

==============================================

Les Pujadas al Port de Salau sont les manifestations phare de notre association. elles se déroulent depuis 25 ans, le premier dimanche d'Août. Elles rassemblent selon le temps entre 300 et 500 personnes. Elles sont co-organisées avec le CAOC (Cercle d'Agermanament Occitano-Catalan) de Barcelone, avec les Fallaires d'Isil. Elle a reçu le soutien de toutes les municipalités du Pallars Sobira et du Haut-Couserans. Elles sont des temps forts d'amitié, de convivencia et de Paratge

-----------------------------------------------------------------------------------------------------------